Մերսիր ինքդ քեզ
Ոչ մեկի համար գաղտնիք չէ, որ մերսումը հիանալի կերպով խթանում է արյան շրջանառությունը: Մեխանիկական ազդեցությունը հյուսվածքներին ստիպում է, որ աշխատող մազանոթների քանակը մի քանի հարյուր անգամ ավելանա, հյուսվածքներն ինտենսիվ կերպով սնունդ ստանան:
Լավ ինքնազգացողության համար մասնագետները խորհուրդ են տալիս ինքնուրույն մերսել այսպես կոչված «օձիքային հատվածը»:
Ինտենսիվ շարժումներով հարկավոր է մերսել ծոծրակի հատվածը, ուսերը և մեջքի վերին հատվածը: Որոշակի հոգնածության դեպքում կարելի է ոտքերի ու մեջքի մերսում կատարել: Նման պրոցեդուրան նպաստում է նաև ուղեղի աշխատանքի լավացմանը, բարձրացնում է տոնուսը: Ավելի մեծ արդյունք է տալիս մերսման կուրսը, որի ընթացքը 7-12 օր է տևում:
Բուժական լոգանք
Թուրմերով լոգանքը մեր օրգանիզմի վրա ունենում է ոչ միայն թարմացնող ու տոնուս տվող, այլև՝ առողջարար ազդեցություն: Իսկ առողջությանը վնաս չհասցնելու միակ պայմանն այն է, որ պրոցեդուրայի տևողությունը 15 րոպեն չգերազանցի: Այդպիսի լոգանք պետք է ընդունել շաբաթական 1-2 անգամից ոչ ավելի:
Ընդ որում, լավագույն տարբերակը առավոտյան է, թեթև նախաճաշից 20-30 րոպե հետո, ճաշից՝ 1-2 ժամ հետո, կամ՝ քնելուց առաջ: Առատ սնունդ ընդունելուց հետո լոգանք ընդունելը խորհուրդ չի տրվում:
Արյան շրջանառության լավացման և տոնուսի բարձրացման համար օգտակար է օգտագործել հազրեվարդ (ռոզմարին), նարդոս (լավանդա), սոճու փշեր, գայլուկի կոներ (шишки хмелья):
Թուրմը ճիշտ պատրաստելու համար 3 բուռ տերևների վրա եռացրած ջուր լցնել, թողնել 15 րոպե թրմվի, քամել և լցնել լոգարանի մեջ: Խոտաբույսերը եռացնել չի կարելի, որպեսզի օգտակար նյութերը և եթերային յուղերը իրենց հատկությունները չկորցնեն:
